बालुवाटारमा भ्रष्टाचारः एकै रातमा १० लाख सिध्याइयो
२७ असार, काठमाडौँ । भूकम्प प्रभावित परिवार दुई छाक खान नसक्ने अवस्था छन्, महिनौं लामो आर्थिक नाकाबन्दीले देशको अर्थतन्त्र जर्जर बनेको छ । समयमै ५ रुपैयाँको सिटामोल खान नपाउँदा कर्णालीमा कयौं नागरिकले ज्यान गुमाइरहेका छन् । यस्तो अवस्थामा प्रधानमन्त्री केपी शर्मा ओलीचाँहि आफैँ कति मितव्ययी होलान् ?
तपाईलाई विश्वास नलाग्न सक्छ, कैयौं नागरिकले एक छाक खान पनि धौ-धौ परिरहेका बेला प्रधानमन्त्री केपी शर्मा ओलीले भने एउटा रात्रीभोजका लागि करिब १० लाख खर्च गरेका छन् ।
प्रसंग हो, नयाँ वर्ष ०७३ को । प्रधानमन्त्री ओलीले नयाँ वर्ष २०७३ मनाउन एकै साँझ ९ लाख ६७ हजार ७ सय ८७ रुपैँया खर्च गरेका छन् ।
जनताले तिरेको करबाट प्रधानमन्त्री ओलीले एकैपटक यति ठूलो रकमको भोज आयोजना गरेका हुन् । त्यो भोजका लागि उनको सचिवालयले नेपाल सरकारको कोषबाट पैसा लिएको छ ।
सचिवालयले घोटाला गर्यो कि ?
सो कार्यक्रम बालुवाटारमा भएको र प्रधानमन्त्रीसमेत सरिक भएकाले खर्च प्रधानमन्त्रीका नाममा देखिएको छ । तर, खर्च व्यवस्थापन गर्ने काम प्रधानमन्त्रीको सचिवालयले गरेको छ । स्रोतको दाबीअनुसार बालुवाटार सचिवालयले पछिल्लो समय खर्च भएको भन्दा दोब्बर तेब्बरसम्म थप बिल भरेर भुक्तानी लिने गरेको छ ।
यसअघि बालुवाटार सचिवालयकै एक सदस्यले प्रधानमन्त्री कार्यालयमा यससँग सम्बन्धित उजुरीसमेत गरेका थिए । उजूरीकर्ताले वालुवाटारका लागि सामान मगाउने र चिनी, चियादेखि लान मिल्नेसम्मका वस्तु केही सचिवालय सदस्यहरुले राति नै आफ्नो घरतिर लाने गरेको भन्दै उजुरी परेको थियो ।
खरिद गरिएका सामानको बिलसमेत दोब्बर-तेब्बर बनाएर भर्ने गरेको आरोप उक्त उजुरीमा लगाइएको थियो ।
पछिल्लो समय प्रधानमन्त्रीको निवासमा भएको खर्चका नाममा सार्वजनिक भएको बिलमा खर्चको आकार अत्यधीक बढेको छ ।
खाजाका नाममा पनि उस्तै खर्च
एकदिनको एक छाक खाजाका लागि मात्र होइन, बालुवाटार निवासमा खाजा खर्चका नाममा पनि उस्तै समस्या देखिएको छ । पछिल्लो समय विभिन्न बैठकको खाजा खर्च शीर्षकमा प्रधानमन्त्री कार्यालयले ४ लाख ७१ हजार भुक्तानी गरेको छ ।
प्रधानमन्त्री निवास बालुवाटारको मासिक खर्च २० लाखभन्दा बढी हुने गरेको प्रधानमन्त्री कार्यालय स्रोतको भनाइ छ ।
प्रधानमन्त्री ओलीले राष्ट्रको सम्पत्तिबाट भोज खुवाएर गुटबन्दी गरेको भन्दै केही समयअघि एमालेकै बरिष्ठ नेता माधवकुमार नेपालले समेत गुनासो पोखेका थिए ।
हेर्नुहोस् प्रधानमन्त्री कार्यालयको खर्चको बिल
source:http://www.onlinekhabar.com/2016/07/451740/
No comments:
Post a Comment